Powhiwhi!

Ki tēnei kēmu me mahi ngātahi ngā tamariki ki te hīraurau i te panga nei, he nui anō te wā ki te rōpū ki te mahitahi, ā, ki te whakapono anō hoki tētahi ki tētahi.

Mā tēnei kēmu hoki rātou e whakakaha ana i ō rātou pūkenga whakahihiwa. Nā te mea i a tātou e oreore, ahakoa he paku noa taua oreore, ka rere te toto ki te tinana, ka kawea te hāora me te kūhuka ki ō tātou roro - inarā ka hui atu taua oreore ki tētahi ngohe me aro ai tātou.

I tēnei ngohe me hiki ake ngā waewae o ngā tamariki i nga ringaringa o ērā atu, ā, kāore pea he pai tēnei ki ētahi o ngā tamariki. Ko tā mātou me arotake ngā piropiro o ngā tamariki mō tēnei āhuatanga i mua i te tākaro i tēnei ngohe.

Ko tā mātou hoki, me kōrero ki ngā tamariki mō te tapu o te māhunga. Me whakaae e ngā tamariki te pā atu ki ō rātou māhunga hei wāhanga o te ngohe, i mua i te tīmatanga o te ngohe.

Wāwāhitia ngā tamariki ki ngā rōpū, kia tokorima, kia tokoono rānei ngā tamariki ki ia tīma, kātahi:

• Me tū ngā tīma ki tētahi porowhita paku noa, ka toro ō rātou ringaringa i mua i a rātou, ka whakawhitihia ngā ringaringa hoki (pērā i te rīpeka X).
• Tonoa ngā tamariki kia whakatata anō ai rātou ki te porowhita, kia puritia ai he ringa o te tokorua anō kei tērā taha o te porowhita (kia rua ngā ringaringa o te tokorua tāngata rerekē!).
• Kei te pai ina he hanga roa tēnei wāhanga, ā, me kōrero hoki rātou ki a rātou (kia kaua rātou e nape i te ringa o tētahi atu!).
• Kātahi ka mahi ngātahi rātou katoa kia matara ai rātou katoa, kia tū ai rātou ki tētahi porowhita, ringa ki te ringa, pokohiwi ki te pokohiwi - ka aro ki roto i te porowhita, ka aro rānei ki waho, kei te pai tonu tēnā.
• Te tikanga ia, ka taea te whakamatara i a rātou anō, ā, he whakatutukinga rawe hoki ki a rātou.
• Engari, ētahi wā ka roa rawa te ngohe nei, ka kitea rānei he raru e tupu ana, ko tā mātou me mutu wawe i a rātou tonu e ngahau ana.

Wāwāhitia ngā tamariki kia nui ake ngā rōpū, ka mahi ngātahi te katoa kia kotahi te porowhita nui.

Hei te otinga, uia ngā tamariki mō te momo ‘tūranga’ i tū ai i a rātou i taua ngohe. I pēhea rātou i āwhina ai ki te rōpū. I aratakina rānei, i tukua mā tētahi atu te arataki, ā, i āta whai i ngā tohutohu rānei. I te tīmatanga i mahi ngātahi ki ngā tāngata e tata ki a rātou? I whakarongo ētahi atu ki ō rātou whakaaro? I whai hua rātou i tō rātou tūranga?

Me pai ō whakahokinga ki a rātou, hei tauira, “He akoranga pai tēnā mōu anō!”, “He kitenge rawe tēnā i te āhua mahi ngātahi o te tīma”.

Hei te wā ka tākaro anō i tēnei ngohe, me tono atu kia whakamātauria he tūranga rerekē. Ka whakahono pea tēnei ki te marau Whakatupu Waiaro.

Whakamātauria he ngohe anō ka aro atu ngā tamariki ki te mahi ngātahi kia whakatutuki i tētahi whāinga. He pai ki a mātou a Mōwhitiwhiti (Loop-de-Loop), a E kore e taea, taku kotahi (Can't Do It Without You), Ki runga, ki raro (Up and Down) and Whakarongo Ki Te Ua (Listen to the Rain).

I ahu mai tēnei ngohe i te pukapuka o Karl Rohnke, Silver Bullets. He pukapuka kī pai i ngā kēmu mātātoa me ngā ngohe whakapono. Mēnā he taitamariki kē āu, he rauemi tino pai kia whai ariā hou ki ngā momo akoranga tākaro. Ka nui anō ngā hua pērā i te mahi ngātahi, i te whakakaha i te kiritau me te whakapakari i te kakama, i te tūtere.